"Ech si ganz gespaant op déi Virwëlztut"

Eng gutt Woch laang ass eise Quiz gelaf. 17 Froe goufe gestallt, am Ganze konnt een dobäi 31 Punkte sammelen.

De Maximum hu sech 6 Leit geséchert (31/31 Punkten), 9 haten een eenzege Feeler (30/31) a 4 haten der zwee (29/31). Och wa mer just 10 Präisser haten, esou hu mir dat elo e bëssen erweidert, fir déi vill gutt Performancen ze wierdegen: 19 Leit dierfe sech iwwer eng "Virwëlztut" freeën. Wat ass an der Tut vum ZLS mat engem flotte Wuert an e puer Logoen drop? Eise Bestseller "Aläert, jauwen, Zockerboun" an eist neit Verbebuch "D'Lëtzebuerger Verben". Freet Iech drop!

Mir hunn eis op alle Fall iwwer Äre flotte Feedback gefreet:

- Keep up the good work an nach e schéine Rescht vun der Woch.

- Ech freeë mech iwwert de Gewënn.

- Dat freet mech ganz vill.

- Dat freet mech elo awer. Domat hat ech net gerechent. De Quiz huet richteg Spaass gemaach!

- Da freeën ech mech awer. Hunn nach ni iergendeppes gewonnen!

- Dat ass eng flott Iwwerraschung ☺️

- Bonjour, dat freet mech wierklech, villmools Merci! Ech si ganz gespaant op déi Virwëlztut.

Bis den 22. Februar ass eise Quiz gelaf, op bookwidgets.com. Motto: Test Äert Wësse ronderëm de Mount Februar an an engems Är orthografesch Kenntnesser an der Lëtzebuerger Sprooch! 20 Minutten hat een Zäit, fir e sëllege Froen ze beäntweren. 151 Leit hu matgemaach. En topp Score. Merci!

PS:

- An de soziale Medie koum d'Fro op, ob et Virwëlztut wier oder Virwëtztut. Béides geet natierlech ;-)

- Weider Infoen iwwer d'ZLS-Publikatioune gëtt et hei.