„D’Lëtzebuerger Orthografie“ ass nees ze kréien
Déi 4. Oplo ass elo do an d'Buch ass nach ëmmer gratis
Wéi am November 2019 eng aktualiséiert a completéiert Orthografie vun der Lëtzebuerger Sprooch virgestallt gouf, war d’Nofro risegrouss. Bannent kierzter Zäit huet dat offiziellt Reegelwierk mussen zweemol nogedréckt ginn.
3 Oploen a 14.000 Exemplairen
Zanter der Rentrée 2020 ass déi aktualiséiert Rechtschreiwung eleng a Kraaft, wat nach emol zu enger grousser Nofro gefouert huet. Ugangs des Joers gouf dofir nach emol nogedréckt – déi 14.000 Exemplairë waren deen Ament all verdeelt an den Zenter fir d’Lëtzebuerger Sprooch (ZLS) huet d’Commandë gesammelt.
Elo ass d’Bichelche mam Titel „D’Lëtzebuerger Orthografie“ nees ze kréien. Fir dat ze feieren, huet den Educatiounsminister Claude Meisch e Mëttwoch de Moien der Madamm Cornelia Baum vun Alzeng, déi d’Buch am Dezember virbestallt hat, den éischten Exemplaire vun der mëttlerweil 4. Oplo iwwerreecht. Zesumme mam ZLS-Direkter Luc Marteling huet de Minister sech mat der linguistesch ganz interesséierter Madamm Baum iwwer déi aktuell Defie vun der Lëtzebuerger Sprooch an iwwer déi aktuell Publikatioune vum ZLS ënnerhalen (weider Informatiounen iwwer d'Bicher hei).
E Mëttwoch de Moien huet de Minister Claude Meisch der Madamm Cornelia Baum vun Alzeng den éischten Exemplaire vun der 4. Oplo iwwerreecht. D'Buch Nummer 14.001.
„D’Lëtzebuerger Orthografie“ gëtt et nach ëmmer gratis. Et kann ee se am Zenter fir d’Lëtzebuerger Sprooch bestellen (einfach op lod@lod.lu mailen, d’Adress wgl. net vergiessen). D’Virbestellunge ginn an den nächsten Deeg verschéckt. Wien d’Buch oder méi grouss Commanden am ZLS-Siège (163, rue du Kiem, L-8030 Stroossen) wëllt ofhuelen, deen ass gebieden, virdrun e Rendez-vous auszemaachen (Tel. 247-88640 oder lod@lod.lu).
Hei um Internetsite vum ZLS kann een d’Orthografie och gratis als PDF eroflueden.
D’Lëtzebuerger Orthografie
Redaktioun: Conseil fir d’Lëtzebuerger Sprooch (CPLL) an Zenter fir d’Lëtzebuerger Sprooch (ZLS)
Editeur: SCRIPT an ZLS
© Ministère fir Educatioun, Kanner a Jugend
Layout: Bakform
Dréckerei: REKA print+
4. Oplo, Lëtzebuerg 2021
ISBN 978-99959-1-163-8
Gratis ze kréie beim ZLS