„D’Lëtzebuerger Sprooch(en)“ zu Jonglënster

Nodeems d'Ausstellung déi lescht Wochen op enger Partie Reese war, ass se elo erëm zu Land. No Paräis a Stroossbuerg steet Jonglënster um Programm. Vum 23. Abrëll bis de 14. Mee kënnt Dir d'Ausstellung vu méindes bis donneschdes tëscht 7:30 an 20:00 an de Lënster Lycée kucke kommen. Freides ass d'Expo vu 7:30 bis 18:00 op. D'Ëffnungszäite vun der Ausstellung riichte sech no den Ëffnungszäite vun der Schoul. 

DVisitt vun der Expo ass gratis, Visiteuren a Visiteusë musse sech an der Loge vun der Schoul um Rez-de-chaussée umellen.

Opgepasst: D'Ausstellung ass den 1. Mee an den 9. Mee zou.

Iwwer d’Ausstellung

D’Ausstellung „D’Lëtzebuerger Sprooch(en)“ versteet sech als Invitatioun, fir sech mat Sprooch a Sproochen auserneenzesetzen. Den Titel ass bewosst méideiteg a soll déi komplex Sproochesituatioun zu Lëtzebuerg erëmspigelen.

D’Ausstellung befaasst sech ë. a. mat den Theemaen: Méisproochegkeet, sproochlech Varietéiten, Geschicht, Sproochwandel a Lëtzebuergesch an der Literatur an an de Medien. Méi konkreet ginn an dräi Statiounen dës Aspekter ënner d’Lupp geholl:

- Méisproochegkeet zu Lëtzebuerg
- Wat ass Lëtzebuergesch a wéi funktionéiert d’Sprooch hautdesdaags?
- Wéi gëtt eng Sprooch gemaach?

Nieft audiovisuellem Material bitt d’Ausstellung och partizipativ Elementer, bei deenen een och zum Deel iwwer säi Smartphone ka matmaachen.