ZLS NEWS

Nei am LOD: Videoe mat Gebäerdesprooch

Eng gemeinsam Initiativ vun der Hörgeschädigten-Beratung SmH an dem Zenter fir d'Lëtzebuerger Sprooch

Wie reegelméisseg op lod.lu surft, deem dierft eng kleng Neierung opgefall sinn: An der lénker Spalt den Hiweis Gebäerdesprooch mat zwou Hänn am Profil. Se sollen op d'Geste vun de Gebäerden hiweisen an an den LOD-Artikele weise se vun elo un, datt een de Lemma oder eenzel Sënner vum Lemma och elo an der Gebäerdesprooch fënnt, als Video, dee sech opklappt, esoubal een op d'Hänn klickt. Natierlech kann een och op d'Wierder an der Läischt op der LOD-Homepage klicken, an deem Fall sinn d'Gebäerdesprooch-Videoen direkt visibel.

Fir den internationalen Dag vun der Gebäerdesprooch goung en éischte Saz vu Videoen online, eng 300 Stéck. Weiderer sinn an der Maach, méi dozou an den nächste Méint.

D'Hörgeschädigten-Beratung SmH (dat steet fir Solidarität mit Hörgeschädigten) vu Steesel an den Zenter fir d'Lëtzebuerger Sprooch (Editeur vum Lëtzebuerger Online Dictionnaire) hunn zesummen d'Initiativ fir dëse Schrëtt a Richtung Inklusioun geholl. Gedréit gouf an de Raim vun der Hörgeschädigten-Beratung, Media4All huet d'Clippe realiséiert. D'Gebäerd gëtt ëmmer fir d'éischt vu vir an an normaler Vitess gewisen, duerno eemol am Ralenti vu vir an och vun der Säit an zum Schluss nach eemol d'Gebäerd vu vir an normaler Vitess.

E Reportage iwwer den Tournage gouf e Mëttwoch, den 23. September 2020 am Magazin vun RTL Télé Lëtzebuerg diffuséiert. Hei fannt Dir en am Replay.

Bis elo si Videoen an dësen Artikelen ze fannen, et sinn der awer - wéi geschriwwen - nach an der Maach. Mir freeën eis op Äre Feedback (E-Mail: lod@lod.lu):