ZLS NEWS

Lëtzebuergesch Landkaart immens beléift

Gratis Offer léist richtegen Hype aus

„WOW! 6000 Bestellungen a 24 Stonnen. Bestellt roueg weider. Mir drécke weider.“ Den Tweet vum Educatiounsminister Claude Meisch huet keng Froen opgelooss: Bannent engem Dag waren net manner ewéi 6.000 Landkaarte mat den Uertschaftsnimm op Franséisch an op Lëtzebuergesch bestallt ginn an esou séier wier dës gratis Offer och nach net eriwwer.

WOW! 6000 Bestellungen a 24 Stonnen. Bestellt roueg weider. Mir drécke weider. https://t.co/rwLgLS5zCi
— Claude Meisch (@MeischClaude) January 11, 2020

[Den rtl.lu-Link huet an der Tëschenzäit geännert]

Kuerz virun de Meldungen iwwer déi grouss Nofro an den nationale Medien hat de Ministère fir Educatioun, Kanner a Jugend per Communiqué matgedeelt:

Ëlwen / Troisvierges, Gehaansbierg / Mont Saint Jean, Larochette / Fiels ...: Dacks ginn et zwee verschidden Nimm fir déi selwecht Lokalitéit. Fir et de Kanner a Jugendleche méi einfach ze maachen, den offiziellen, meeschtens franséischen Numm mat dem lëtzebuergeschen Numm ze associéieren, huet de Ministère fir Educatioun, Kanner a Jugend eng Landkaart mat den Nimm vun den Uertschaften an de Flëss a béide Sproochen erausbruecht an un all Grondschoulen a Lycéeë geschéckt.

Dës zweesproocheg Landkaart ass natierlech och fir Erwuessener nëtzlech. Si kann dofir vu jidder Interesséierten am A2-Format gratis beim Ministère bestallt ginn. De Bestellformulaire fënnt een ënner http://edulink.lu/unpa.

Déi lëtzebuergesch Uertsnimm goufe vum Conseil fir d'Lëtzebuerger Sprooch (Conseil permanent de la langue luxembourgeoise, CPLL) festgehalen. Op cpll.lu fënnt een ausserdeem eng Lëscht mat den uechter d'Land geleefegen Nimm, déi op der Kaart publizéiert goufen, a mat deenen Nimm, déi eventuell éischter an den Uertschafte selwer benotzt ginn.

Um CPLL-Site sinn dʼNimm an enger Excel-Datei erofzelueden.

DʼKaart selwer ass och am PDF-Format disponibel.

Natierlech goufen all dës Uertsnimm vum Zenter fir dʼLëtzebuerger Sprooch (ZLS) och am Lëtzebuerger Online Dictionnaire (LOD) opgeholl.

Op der LOD-Homepage fannt Dir elo e Knäppchen, deen Iech dʼUertsnimm an alphabetescher Reiefolleg presentéiert. Dir fannt se awer och alleguer hei drënner, mat Link op den LOD.

Virdrun nach dësen Hiweis: Mir iwwerschaffen aktuell nach eis Beispillssätz, datt een iwwerall gewuer gëtt, wéi eng Prepositioun lokal an direktional geholl ginn: Ech wunnen um Briddel, ech fueren op de Briddel. Ausserdeem integréiere mir en Hiweis op déi lokal Varianten an den Artikel vun der Haaptvariant. Deemno géif Wormer net just op Wuermer verweisen, ma bei Wuermer géif een och iwwer Wormer informéiert ginn.