Zil vun der Recherche
D’Haaptaufgab vum Lëtzebuergeschcours an den Insertiounsklassen ass et, de Schüler
duerch d’Ausbilde vun hirer mëndlecher Ausdrocksfäegkeet eng besser Integratioun ze
erméiglechen. Fir dat ze realiséieren, gëtt eng Unterrechtsmethod gebraucht, déi virun allem
d’mëndlech Kompetenz an den Zentrum stellt a gläichzäiteg och emotional Blockaden
ofbaue kann; Uspréch, déi d’Dramapädagogik u sech selwer stellt. Am Zesummenhank mat
dëser Method ginn an dëser Aarbecht dräi Froen ënnersicht: Et gëtt éischtens analyséiert, ob
duerch d’dramapädagogesch Aktivitéiten de Schwätzundeel vun de Schüler am Cours
erhéicht gëtt, fir hir mëndlech Ausdrocksfäegkeet ze verbesseren, zweetens ob d’Schüler
doduerch hir Angscht virum Schwätzen op Lëtzebuergesch ofleeën an drëttens ob si op
d’sproochlecht Alldagshandele virbereet ginn. Donieft gëtt sech awer och dofir interesséiert,
wéi d’Dramapädagogik an der Erwuessenebildung am Verglach zum Lycée agesat ka ginn.
Methodologie
Fir mech an d’Schüler mat der Dramapädagogik ze familiariséieren, sinn
d’Grondinzeenéierungstechniken, wéi d’Mimen, d’Standbiller an d’Rollespiller, am Laf
vum Joer regelméisseg an den Unterrecht integréiert ginn; de Cours ass also net
ausschliisslech op d’Dramapädagogik opgebaut ginn. Zousätzlech dozou hunn d’Schüler
eng Radiosemissioun geschriwwen an opgeholl. D’Aktivitéite sinn duerno all kritesch
reflektéiert ginn an et gëtt an der Aarbecht duergeluecht, wat bei der Duerchféierung
funktionéiert huet a wat net a firwat. Zu all Inzeenéierungstechnik gëtt och nach analyséiert,
wat hiren Notzen ass a wéi se am beschten agesat a variéiert ka ginn. Duerch meng
Reflexioun, mä och Froebéi, déi d’Schüler ausgefëllt hunn, gëtt zum Schluss e Bilan iwwert
d’Schaffe mat der Dramapädagogik am Lycée gezunn an e Verglach, an Zesummenaarbecht
mat der Madame Fabienne Logelin-Kohl, mat der Erwuessenebildung virgeholl.
Resultater
D’Ziler vun dësem Projet konnten nëmmen deelweis erreecht ginn: De Schwätzundeel vun
de Schüler gouf zwar erhéicht, hir mëndlech Ausdrocksfäegkeet konnt verbessert ginn,
d’Angscht virum Schwätze konnt awer nëmmen am Usaz ofgebaut an d’Fäegkeet, spontan
ze kommunizéieren, quasi guer net entwéckelt ginn.